كشف المستور حكايات صافي هاني

دخلت المكتب وطلعت ملف أسود كان مستخبي ورا الكتب، الملف ده فيه الحقيقة اللي وائل مكنش يتخيل إنها عارفاها؛ مش بس إنه كان بيسحب سيولة من وراها، ده كمان كان بيخطط مع سلمى إنهم يفتحوا كيان منافس بنفس أسرار شغل إيناس وعملائها.
تاني يوم الصبح، المستشفى اتقلبت.
وائل كان لسه بيحاول يقوم، لقى مندوب من البنك ومعاه محضر حجز على أرصدة كان فاكر إنها ملكه، واكتشف إن إيناس لغت التوكيلات العامة اللي كانت مدياها له من سنين قبل الحادثة ب 24 ساعة بس!
دخلت ليلى حماتها وهي بتصوت
إلحق يا وائل، إيناس رفعت قضية خيانة أمانة واختلاس، والبوليس سأل عنك في الشركة!
في نفس الوقت، كريم أخو إيناس دخل الأوضة وهو وشه جايب ألوان، بص لمراته سلمى بنظرة كفيلة تنهي كل حاجة
الشغل اللي كنتي بتعمليه من ورايا مع وائل كلفني نصيبي في المصنع.. إيناس اشترت أسهمي كلها عشان تسدد الديون اللي إنتو غرقتونا فيها!
سلمى حاولت تتكلم، بس كريم قاطعها
ورقتك هتوصلك، وإيناس مش هتنازل عن حقها في الفلوس اللي اتسحبت، يعني هتبيعي كل اللي وراكي وقدامك عشان تسددي.
وائل كان قاعد على السرير، مصدوم، حاسس إن السقف بيقع فوق دماغه. مكنش متخيل إن الست اللي مابتخلفش وباردة زي ما كان بيقول، كانت شايفة كل حركة بيعملها وسايبة له الحبل لحد ما يشنق نفسه بيه.
بعد أسبوع، إيناس كانت قاعدة في مكتبها الجديد، الشمس داخلة من الشباك، وصوت السكرتيرة بيقولها إن فيه صفقة جديدة تمت.
رن موبايلها، كان رقم وائل.. ماردتش.
بعت رسالة أرجوكي يا إيناس، أمي تعبانة، وإحنا خسرنا كل حاجة، بلاش الفضيحة، خلينا نحلها ودي.
إيناس بصت للرسالة بابتسامة خفيفة، وكتبت رد واحد بس
إنت قولت إن الرجالة بيتعبوا.. وأنا قررت أريحك من كل مسؤولياتك، من الشركة، ومن البيت، ومني. الحقيقة وجعتكم عشان مكنتوش متعودين عليها، بس دلوقتي وقت الحساب.
قفلت الموبايل، وقامت وقفت قدام الشباك وهي حاسة لأول مرة من سنين إنها حرة. مكنتش محتاجة تصرخ عشان تاخد حقها، سكوتها وذكاءها كانوا أقوى من أي زلزال هز عيلة المنصور كلها.
بعد ما بعتت الرسالة، إيناس قفلت الموبايل تماماً وطلبته من السكرتيرة إنها ما تحولش أي مكالمات من العيلة دي مهما حصل.
في المستشفى، كانت الأوضة عبارة عن بركان. ليلى قاعدة بتعيط بانهيار مش على ابنها، لكن على المنظرة والوجاهة الاجتماعية اللي ضاعت في ثانية. وائل كان باصص للسقف ودموعه نازلة، مش ندم، لكن صدمة من القلم اللي خده من أكتر واحدة كان فاكر إنه كاسرها.
كريم أخوها خرج من المستشفى وراح لإيناس المكتب. دخل وهو مطاطي راسه، مش قادر يحط عينه في عينها.
أنا آسف يا إيناس.. أنا كنت مغيب، كنت فاكر إن مراتي بتساعدني في الشغل، مكنتش أعرف إنها بتبني قصرها على خرابة بيتي وبيتك.
إيناس بصتله بهدوء، قامت من ورا مكتبها وقربت منه، حطت إيدها على كتفه
يا كريم، اللي مبيشوفش من الغربال يبقى أعمى. أنا حذرتك كتير من طمع سلمى، وإنت كنت بتقول عليا بغير منها. دلوقتي المصنع بقى ملكي، وأنا مش هسيب أخويا يقع.. هترجع تديره بس ك مدير مش صاحب مال، لحد ما تثبت لي إنك اتعلمت الدرس.
كريم عيط من كرمها، وعرف إن أخته الباردة هي الوحيدة اللي صانت أصله لما الكل باعه.
مرت الشهور..
وائل خرج من المستشفى بعاهة مستديمة في رجله هتخليه يمشي بعكاز طول عمره، كأنها علامة تفكره باليوم اللي قرر فيه يلف ويدور من وراها. لقى نفسه مديون بمبالغ خرافية، والفيلا اللي كان بيتباهى بيها اتحجز عليها.
أما سلمى، فلقيت نفسها وحيدة، كريم طلقها وطردها من البيت بشنطة هدومها، وأهلها اتبروا منها بعد الفضيحة اللي حصلت في المحاضر الرسمية بتهمة التدبير للاستيلاء على أموال شركة إيناس.
في يوم، إيناس كانت في حفلة تكريم لسيدات الأعمال الناجحات. كانت لابسة فستان أسود بسيط وشياكتها تخطف العين. وهي واقفة بتستلم الجايزة، سألتها مذيعة
إيه سر قوتك؟ إزاي قدرتي تتخطي أزمة شخصية وعملية في وقت واحد وبمنتهى الثبات ده؟
إيناس مسكت المايك، وبصت للكاميرا وكأنها بتوجه الكلام لشخص بعينه
السر في السكوت. لما تلاقي اللي قدامك بيستهين بذكائك، سيبه يصدق كذبته لحد ما يغرق فيها. القوة مش في الزعيق ولا في دور الضحية.. القوة إنك تكوني الحقيقة الوحيدة في حياة مليانة كدابين.
نزلت من المسرح وسط تصفيق حار، وطلعت برا القاعة، شمت هوا نقي، وحست إن حياتها الحقيقية لسه بتبدأ دلوقتي.
تمت.